|
Ce’ piacere m’è fattu la Marisa martitìa a sira
cu mi ccumpagna a ‘nu bedhru ricevimentu.
Lu core s’è piertu cu bbisciu la signora Elvira
e cu piju parte cu tutti a dhru festeggiamentu.
Idhra, l’aura mmane, m’è dittu cu convinzione.
“sta’ more Carniali e tinimu ‘nu dovere a fare.
N’amu dare tutti li onori comu ole la tradizione
e tutti riuniti intr’allu locale, l’amu festeggiare”.
“Sorta mia, aggiu tittu jou, già sta’more?
No bbe’ fattu a ttiempu mancu cu crisce,
ca ni sta dae stu dispiacere intr’allu core?
Tante cose ca succedune… ci li capisce!”
Comunque m’è parsu ca adhrai stìane tutti dispiaciuti
ca lu Carniali, piccicchiedhru, li sta’lassava an quartu.
È sparati ddo’ fuechi pi li bueni, li ricchi e li cannaruti
e poi “ rassegnatibbe tutti”, è dittu, “tocca mi ni partu.
“Ce buliti faciti”, ni tissi, “ cu lu onorati comu si spetta?
Uliti cu lu chiangiti, ritannu e sventulannu lu fazzulettu?
Cantatine do’canzuni, ballati e a chiacchere no’dati retta,
tuccatilu ti la capu allu pete e mintitine li mane an piettu.
Lu core sua sta batte ‘ncora, e face finta ca è muertu,
l’annu c’ene ha turnà ‘ntorna e tutti cquai l’ati spittare.
Facitibbe curaggiu, tirati annanzi cu rittu o no stuertu
e mintitibe an capu ca pi muti anni ‘ncora l’ati onorare.
Certu, è stranu comu l’ati sistematu intr’a sta cascetta.
immobile e bellu tuestu comu a nnu salame ti milanu.
Jou pensu ca ci lu ncarizzati e ni cuntati na barzelletta,
si minte a rìtire e a tutti quanti cerca bi mina la manu.
E’ tuttu nu scherzu stu carnevale, ui ormai lu sapiti,
ogne scusa è bona cu stati ‘nsieme e cu bbi divertiti.
La vita ete una e, comu è meju, conviene cu la passati,
tantu li tasse rìane li stessu e tocc’an forza cu li pacati.
Lu governu bbe sistemati pi le feste e pi li uttisciane
alla facce ti tutti dhri malecarni e dhri bone cristiane
ca nchianane addhra subbra sempre cu tante promesse
e no’ capiti ca li frecature so’ bosce e sempre li stesse.
Jou aggiu spicciatu ti scrivire sti quattru parole
e scusatime ci quarchetunu s’è puru scocciatu.
Alla base ti tuttu ‘stu discorsu nc’ete ‘nu core
ca è bistu lu tuce ma lu maru l’è puru ssaggiatu.
Bbi ringraziu tantu pi l’onore ca m’ati tatu
e pi lu grande interesse ca m’ati dimostratu
ci, lu prossimu annu, a sta festa no’ mi uliti,
la Marisa si face li fatti sua e cquai no m’ititi”.
|
